1. ምንተኑ አዓሥየኪ ዕሤተ፣
በእንተ ኵሉ ዘገበርኪ ሊተ፣
ማርያም ሠናይት ዘታፈቅሪ ምሕረተ፣
ሶበሰ ተትዓቀቢ ዘዚአየ ኃጢአተ፣
እምኢሐዮኩ አሐተ ሰዓተ።
2. በሰላመ ገብርኤል መልአክ ኦ እግዝእትየ ማርያም ሰላም ለኪ፣
ድንግል በኅሊናኪ ወድንግል በሥጋኪ፣
እመ እግዚአብሔር ጸባዖት ሰላም ለኪ፣
ቡርክት አንቲ እምአንስት ወቡሩክ ፍሬ ከርሥኪ፣
ተፈሥሒ ፍሥሕት ኦ ምልዕተ ጸጋ እግዚአብሔር ምስሌኪ።
3. ኦ ርኅሩኀነ ልቡና አፍቅሮተ ሰብእ ልማድክሙ፣
በጥቡዕ ልብ ንስእለክሙ፣
ሥሉስ ቅዱስ ምሕረተክሙ አዝንሙ፣
ክሣደ ፀርነ በሰይፍክሙ ግዝሙ፣
ወዲበ ርእስነ ዓዲ እዴክሙ ሢሙ።
4. ኦ ርኅርኅተ ኅሊና አፍቅሮተ ሰብእ ልማዳ፣
ሰአሊተ ምሕረት ይእቲ ማርያም ሐፁረ መስቀል ዘየዓውዳ፣
ንትቀበላ ንዑ ለወለተ ዳዊት ዘይሁዳ፣
መጽአት ነዋ ኅቡረ ምስለ ወልዳ፣
ናንፈርዕፅ ቅድመ ሥዕላ እንዘ ንሁብ ጋዳ፣
ለለጌሠሙ ትመስል እንግዳ።
5. ኦ ርኅርኅተ ኅሊና ዘሕገ ልማዳ ምሕረት፣
ለኵሉ ፍጥረት፣
ንሳለማ ንዑ ለሥዕለ ማርያም ቡርክት፣
ወለሥዕለ ወልዳ ጸባዖት ወለሥዕለ ጊዮርጊስ ሰማዕት፣
ሥዕለ ሚካኤል ወገብርኤል ወሩፋኤል ዘራማ ኃይላት።
6. ኦ ርኅርኅተ ኅሊና ፍቅርኪ ያነድድ አማዑተ፣
ከዊኖ እሳተ፣
ንጽሐ ድንግልናኪሰ እንተ ኢያእመረ ርስሐተ፣
ማርያም ግበሪ ሠናያተ ኵሎ ዕለተ፣
ሞትሰ ድልው ሊተ፣
ባሕቱ ለንሥሓ ጽንሕኒ ንስቲተ።
7. ኦ ርኅርኅተ ኅሊና ለእግዚአብሔር አስከሬኑ፣
እንተ ኢያውዓየኪ እሳተ ርስኑ፣
መሐርኒ ድንግል ወተሣሃልኒ በበዘመኑ፣
ለእመ መሐርክኒ እግዝእትየ ዘይኴንነኒ መኑ፣
ኰናኔ ሥጋ ወነፍስ ወልድኪ አኮኑ።
8. ኦ ርኅርኅተ ኅሊና እንተ ኤልያስ ደመና፣
ወለተ ኢያቄም ወሐና፣
ማርያም ዑጽፍት ወኁብርት በቅድስና፣
ሶበ ነጸረኪ ሙሴ በሲና፣
ኅትምት በድንግልና አልባቲ ሙስና።
9. ተአምርኪ ብዙኅ ዘአልቦ ፍጻሜ፣
በርኅበ ዓለም ሰፈነ አምሳለ ደመና ወጊሜ፣
ማርያም ድንግል ደብተራ ጳውሎስ ዘብሔረ ሮሜ፣
ተማሕፀንኩ በሕፃንኪ ዘሐዘለቶ ሰሎሜ፣
እንበለ ንሥሓ ኢይሙት ወስክኒ እድሜ።
10. ቅድመ ሥዕልኪ እሰግድ ወአስተበርክ ክሡተ፣
ቅድመ ማኅበራንኪ እሉ እንዘ እቀውም ድርገተ፣
ፈጻሚተ መፍቅድ ማርያም እስእለኪ ስእለተ፣
ጸግውኒ እግዝእትየ ለዓለመ ዓለም ሕይወተ፣
እምእደ እኩያን አፅራርየ አድኅንኒ ሊተ።
11.ቅድመ ሥዕልኪ እሰግድ ወለሥዕለ ወልድኪ እገኒ፣
ማርያም ድንግል ማርያም እመ አዶኒ፣
ማዕበለ ጌጋይ ጽኑዕ ሶበ ለአስጥሞ በጽሐኒ፣
ሐመርየኒ ማዕዶትየኒ ሃይማኖትየኒ፣
ማርያም ዘእንበሌኪ አልብየ ምንትኒ።
12. ሰላም ለሥዕልኪ ዘይኤድም ለንጻሬ፣
ዓዲ ሰላም ወለሥዕለ ወልድኪ በኁባሬ፣
አክሊለ ሢመቱ ለጴጥሮስ ማርያም እንተ ትፀድሊ እምወራውሬ፣
ለተአምርኪ ባቊዕ ሶበ ናቄርብ ዝማሬ ፣
ክድንነ ለአግብርትኪ ሣህለኪ ጶደሬ።
13. ሰላም ለሥዕልኪ መዓዛ ቅዳሴ ዘቦቱ፣
ወለሥዕለ ወልድኪ ሰላም ዘያስተፌሥሕ ስነ ርእየቱ፣
ለሐዋርያ እንድርያስ ቀዳማዊ ማርያም ሃይማኖቱ፣
ናሁ ገደፍኩ ሕይወትየ ቅድመ ተአምርኪ ዝንቱ፣
ዓለሙኒ ኃላፊ ንብረቱኒ ኃላፊ እስመ ኵሉ ኃላፊ ውእቱ።
14. ሰላም ለሥዕልኪ ዘክንፈ መላእክት ምጽላሉ፣
ወጸዳለ ክርስቶስ ስነ ጸዳሉ፣
እመ ያዕቆብ በጸጋ ማርያም እግዝእተ ኵሉ፣
ናሁ አግብርትኪ በቃለ ማኅሌት ይብሉ፣
ስብሐት ወክብር ወሰጊድ ለመንግሥትኪ ይደሉ።
15. ሰላም ለሥዕልኪ ወለሥዕለ ወልድኪ ዘሰዐሞ፣
ዮሐንስ ርኄ ዮሐንስ ቀናንሞ፣
ለዝ ወልድኪ መሐሪ ኅሩመ በቀል ወተቀይሞ፣
ማርያም ሀብኒ በእዴኪ እንዘ ትጼውዒ ስሞ፣
ሥጋሁ ቅዱሰ ወክቡረ ደሞ
16. ሰላም ለሥዕልኪ ወለሥዕለ ወልድኪ በመትሎ፣
እንተ ነገደ ወሖረ መንገለ አቃርዮስ ሀሎ፣
ኀበ ዝ ወልድኪ ፈጣሪ ናትናኤል ዘይትዌከሎ፣
ከመ የሀበኒ ጽድቆ ወይጸግወኒ ሣህሎ፣
ድንግል በእንቲአየ አብዝኂ ተንብሎ።
17.ሰላም ለሥዕልኪ ሐፈ ማኅየዌ፣
በጼዴንያ ወግብፅ ዘአውኀዘት በኢሕሣዌ
ለመጸብሐዊ ማቴዎስ ማርያም እንተ ረሰይኪዮ ወንጌላዌ፣
ይኩነኒ ወትረ ጸሎትኪ እምዘመነ ኵሉ ምንሳዌ፣
ዐቃቤ ዘመዓልት ወዘሌሊት ሀላዌ።
18. ሰላም ለሥዕልኪ ሶበ ጸለየት ማርታ፣
አጽኒና ርእሳ ከመ ትትመጦ ስእለታ፣
ምክሐ ታዴዎስ አንቲ ማርያም ወሞገሰ ቶማስ ስሙየ መንታ፣
አመ ኢታድኅን እም ወለታ ወአመ ታገብእ ምድር ማኅፀንታ፣
ኩንኒ ለመዋቲ ሐገፋ ወወልታ።
19. ሰጊድ ወአምኃ ይደሉ ለሥዕልኪ፣
ወለሥዕለ ክርስቶስ ወልድኪ፣
ወይነ በርተሎሜዎስ አንቲ ማርያም ዘያስተፌሥሕ ጣዕመ ፍቅርኪ፣
አንብርኒ ከመ ኅልቀት በውሣጤ ርኅሩኅ ልብኪ
ወከመ ማዕተብ ፁርኒ በመዝራዕትኪ።
20. ሰላም ለሥዕልኪ ዘመአድም ብርሃኑ፣
ወፍትው ሞገሰ ስኑ፣
ሃይማኖተ ፊልጶስ አንቲ ማርያም ከመ ጳውሎስ ይዜኑ፣
ሕማምኑ መጥባህትኑ ፃዕርኑ፣
አኅድጎ ፍቅርኪ ዘይክለኒ መኑ።
21. ሰላም ለሥዕልኪ ቦ ጊዜ ዘትትናገር፣
ወቦ ጊዜ ዘትክዑ ደመ ተአምር፣
ማርያም ስብሕት ወውድስት እመ እግዚአብሔር፣
ለማትያስ ሙቁሕ ወለያዕቆብ ውጉር፣
እስመ አንቲ ሞገሶሙ በሰማይ ወምድር።
22. በኢትዮጵያ ወግብፅ ወሶርያ በአንጾኪያ ወሮም፣
ለሥዕላትኪ ዘሀለዋ ማርያም ሰላም፣
ምስለ ኤጲስ ቆጶስ ያዕቆብ ዘኢየሩሳሌም፣
ይምጽኡ ኀቤነ ዘእምኀቤኪ ለባርኮትነ ዮም፣
ማርቆስ ዘአንበሳ ወሉቃስ ዘላህም።
23. ሰላም ለሥዕልኪ እንተ ሠዐላ በእዱ፣
ሉቃስ ጠቢብ ዘእምወንጌላውያን አሀዱ፣
አመ ተቀብዑ ማርያም እምሐፈ ሥዕልኪ ቅብዐ ናርዱ፣
በሕማም እኩይ እለ ደወዩ ወውህዱ፣
ፅዑራነ ዓለም ጥዕዩ ወጥቀ ፈድፈዱ።
24. ሰላም ለሥዕልኪ ወለሥዕለ ወልድኪ አልፋ፣
ማርያም ዘኮንኪ ለኃጥአነ ምድር ተስፋ፣
እመቦ እምሰብእ ዘይሜንና ወዘይገድፋ፣
ለተአምርኪ ባቊዕ እንተ ደቅስዮስ ጸሐፋ፣
ውጉዘ ይኩን በቃሎሙ ለሳውል ወኬፋ።
25. ተማኅፀንኩ እግዝእትየ ማርያም በመልክአ ሥዕልኪ ዛቲ፣
እንዘ እሰግድ ቅድሜሃ ወእትጋነይ ላቲ፣
ማርያም ድንግል ማርያም ወለተ ማቲ፣
ቤዛ ቤዛ ቤዛ ነፍሰ ኵሉ መዋቲ፣
በሰማይኒ ወበምድር አንቲ።
26. ሰላም ሰላም ለመልክአ ሥዕልኪ ኵሉ፣
እምነ ፀሐይ ወወርኅ ዘያበርህ ስነ ፀዳሉ፣
ወበእንተዝ ማርያም ስብሐተ ዚአኪ ይብሉ፣
እስመ አባልኪ ለእግዚአብሔር አባሉ፣
ማርያም በረከትኪ ምስሌነ የሃሉ።
ያዳምጡት https://youtu.be/tobGssdKuUo
